നേർവഴി

കഴിവും നന്മയും തിരിനാളമായ് നയിക്കെ
ഇടവഴിയിൽ വെച്ചൊരു വൈദ്യൻ വന്നു..
നിവർന്നു നിൽക്കുന്നൊരു നട്ടെല്ലിലൊരു
ആണിയടിച്ചു ബോധം കെടുത്തി,

പെറുക്കിയെടുത്തു രോഗലക്ഷണങ്ങൾ..
കാണേണ്ടാത്തത് കാണുന്നു
കേൾക്കേണ്ടാത്തത് കേൾക്കുന്നു
പറയേണ്ടാത്തത്‌ പറയുന്നു
ചിന്തിക്കേണ്ടാത്തത് ചിന്തിക്കുന്നു..

എല്ലാം വാരി മുതുകിൽ വെച്ച് കെട്ടിത്തന്നു..
 താങ്ങാൻ പറ്റാത്ത വലിയ ഭാണ്ഡം!
ഓരോന്നായി വഴിയിലുപേക്ഷിച്ച്
ഇന്ദ്രിയ നിയന്ത്രണം നടത്താനുപദേശം..  
നട്ടെല്ല് വളച്ച്, ഭാണ്ഡവുമായി നടന്നു..
നടു നിവർന്നപ്പോൾ വഴി തെറ്റിയിരുന്നു..