ഈയടുത്ത കാലത്ത് S.S .L .C ഫലത്തിൽ ഉണ്ടായിക്കൊണ്ടിരിക്കുന്ന  അഭൂതമായ വളർച്ച സംശയങ്ങൾക്കൊപ്പം, ആശങ്കയും ഉണ്ടാക്കുന്ന ഒന്നാണ്. കുട്ടികളുടെ പഠന മികവ് കഴിഞ്ഞ കാലങ്ങളെ അപേക്ഷിച്ച് വർദ്ധിച്ചിട്ടുണ്ട് എന്ന വസ്തുതയും, പരീക്ഷകൾ കുട്ടികളെ തോൽപ്പിച്ചു തള്ളാനുള്ള മാർഗ്ഗം അല്ല എന്നീ വാദഗതികൾ നിലനിൽക്കുമ്പോൾ തന്നെ, പഠന നിലവാരം ഇല്ലാത്ത കുട്ടികൾ ഉപരി പഠനത്തിനു പോകുമ്പോൾ ഉണ്ടാകുന്ന മാനസിക സംഘർഷങ്ങളും, സാമ്പത്തിക ബാദ്ധ്യതകളും വിസ്മരിക്കാൻ പാടുള്ളതല്ല. ഇത് വിദ്യാഭ്യാസ നിലവാരം കുറയ്ക്കാനും, അത് വഴി സാമൂഹിക സാമ്പത്തിക പ്രശ്നങ്ങൾ സമൂഹത്തിൽ ഉണ്ടാക്കുകയും ചെയ്യും എന്ന കാര്യത്തിൽ സംശയം ഇല്ല. S.S .L .C ഫലത്തിൽ പുതിയ strategy കൊണ്ടുവന്നതിനു പിന്നിൽ ഉള്ള കച്ചവട താൽപര്യങ്ങൾ ആണ് അതിനെക്കാൾ ഞെട്ടിപ്പിക്കേണ്ടത്. സങ്കുചിത താൽപ്പര്യങ്ങളും, സാമ്പത്തിക ലാഭവും നോക്കി കയ്യും കണക്കുമില്ലാതെ അനുവദിച്ച പ്ലസ്‌ ടു ബാച്ചുകളും അതുവഴിയുള്ള അഴിമതിയും ഇതുമായി കൂട്ടി വായിക്കേണ്ടതാണ്. പാസ്സാകുന്ന എല്ലാവർക്കും അഡ്മിഷൻ കൊടുത്തൽ തന്നെ സീറ്റുകൾ ബാക്കിയുള്ളപ്പോൾ, ഇനി കുട്ടികളെ തോൽപ്പിച്ചാൽ എന്താകും എന്ന ചിന്തയും ഇതിനു പിന്നിൽ ഉണ്ടാകാം. ഇനി പ്ലസ്‌ ടു ഫലത്തിൽ കൂടി ഈ strategy കൊണ്ട് വന്നാൽ വലയും വിരിച്ചിരിക്കുന്ന സ്വാശ്രയ പ്രൊഫഷണൽ കോളേജുകൾക്ക് അതിൻറെ ഫലവും കിട്ടും. ലോണ്‍ എടുത്തും മറ്റും രക്ഷാകർത്താക്കൾ കുട്ടികളെ പഠിപ്പിച്ചു കൊണ്ടേ ഇരിക്കും. പത്താം തരം പാസാകുന്ന കുട്ടി വൈറ്റ് കോളർ ജോലി തിരക്കി നടക്കുമ്പോൾ, കടം വീട്ടാൻ രക്ഷകർത്താക്കൾ നെട്ടോട്ടം ഓടും. അപ്പോളും അന്യസംസ്ഥാന തൊഴിലാളികൾ ഇവിടെ വന്ന് അന്തസ്സായി ജോലി ചെയ്ത് സമ്പാദിക്കുന്നുണ്ടാകും !

നിനക്കായുള്ള ഓരോ കാത്തിരിപ്പിനും
ഒരു വ്യാഴവട്ടത്തോളം ദൈർഘ്യമുണ്ട് 
നിൻറെ ഓരോ വരവിനും
നീലക്കുറിഞ്ഞി പൂക്കുന്ന ശോഭയാണ്
നിൻറെ ഓരോ സ്പർശനത്തിനും
ഒരു മഞ്ഞു തുള്ളിയുടെ കുളിർമയുണ്ട് 

എത്രനാളീ തിരിനാളമണയാതിരിക്കും ?
എള്ളെണ്ണ ചിരാതിൽ വറ്റുവോളോ ?
കാറ്റിനെ വെല്ലുവാൻ ശക്തിയറ്റുവോളോ  ?
മാനത്തെ മേഘമിങ്ങെത്തുവോളോ ?

ഇല്ല,പ്രതീക്ഷയൊട്ടുമെ
ഇക്കൊടി ചുമക്കും
ഗ്രന്ഥപ്രഭുക്കളിൽ..
തണലേകുന്നില്ല
മുദ്രാവാക്യങ്ങൾ പോലും..
കെട്ടിമുറിക്കി പണിയും
കോട്ടയിൽ പ്രജകളില്ലാ
രാജാക്കന്മാർ !
സംരക്ഷകരല്ലിവർ,
സർവ്വവും ചാരമാക്കും
ചാരന്മാരോ പിന്നെ ?

തെക്കനും വടക്കനും

അവൾ, തെക്കോട്ട്‌ തിരിഞ്ഞു നിന്ന്
ചെറുപുഞ്ചിരിയാൽ കുശലം പറഞ്ഞു..
അവൻ, വടക്കോട്ട്‌ തിരിഞ്ഞു നിന്ന്
മലർക്കെ ചിരിച്ചു അഭിവാദനം ചെയ്തു..
അവൾ, പുഞ്ചിരിയോടെ തന്നെ തിരിച്ചു നടന്നു
അവൻ, കണ്ണിറുക്കി, വിജയിയെ പോലെയും

വെളിച്ചം അരിച്ചിറങ്ങാൻ തുടങ്ങിയിട്ടേ ഉണ്ടായിരുന്നൊള്ളൂ. കൂട്ടുകാരൊത്തു ഒരു ഉല്ലാസയാത്രയിൽ ആയിരുന്നു ഞാൻ. കളിച്ചും, ചിരിച്ചും, കഥപറഞ്ഞും സഞ്ചരിച്ചു കൊണ്ടിരിക്കലെ ആണ്, വായിൽ വെള്ളമൂറുന്ന ഒരു മാംസ കഷണം മുന്നിൽ വന്നു പെട്ടത്. ഞങ്ങൾ മൂന്ന്പേർ തമ്മിൽ അതിന് വേണ്ടി ഒരു കൊച്ചു മത്സരം നടന്നു. എല്ലാവരും കുറേശ്ശെ കുറേശ്ശെ കടിച്ചെടുക്കാൻ ശ്രമിച്ചുകൊണ്ടിരുന്നു. ഒരുമിച്ച് സ്വന്തമാക്കാം എന്ന അത്യാഗ്രഹം കൊണ്ടൊന്നുമായിരുന്നില്ല, അവസാനം അത് മുഴുവനും എൻറെ വായിലാണ് പെട്ടത്. ഭക്ഷണത്തോടൊപ്പം, ഞാൻ കൂട്ടത്തിൽ നിന്നും അകറ്റപ്പെട്ടു. ആ ഭക്ഷണത്തിനുള്ളിലെ കെണി എനിക്ക് മനസ്സിലായത് അപ്പോളാണ്. പെട്ടെന്ന് തന്നെ വെളിച്ചത്തിന് ശക്തി കൂടുകയും, ചൂട് അനുഭവപ്പെടുകയും ചെയ്തു. കണ്ണ് തുളച്ച് കയറുന്ന വെളിച്ചം ! ശ്വാസം കിട്ടാൻ പ്രയാസമനുഭവപ്പെട്ടു തുടങ്ങി. എവിടെയോ ചെന്ന് തലയടിച്ചു വീണു. വേദനകൊണ്ട് ഞാൻ പുളഞ്ഞു. ബോധം മറയുന്നത് പോലെ തോന്നി.കുറച്ച് കഴിഞ്ഞപ്പോൾ എൻറെ ആത്മാവ് എൻറെ ശരീരത്തിൽ നിന്നും വേർപെടുന്നത് ഞാൻ അറിഞ്ഞു.

എൻറെ ശരീരത്തിനൊപ്പം യാത്ര ചെയ്ത്, എന്ത് സംഭവിക്കുന്നു എന്നറിയാൻ ആഗ്രഹമായി. കൂട്ടത്തിലേക്ക് ഞാൻ എടുത്തെറിയപ്പെട്ടു. ആ കൂട്ടത്തോടെ തന്നെ ഞാൻ കൈമാറ്റം ചെയ്യപ്പെട്ടു. കൈകൾ മാറി മാറി ഞാൻ ഇവിടെ എത്തി. എൻറെ ശരീരം വെട്ടിമുറിച്ച്‌, പല ആകൃതിയിൽ ആക്കപ്പെട്ടു. എന്തൊക്കെയോ തേച്ച്പിടിപ്പിച്ച് കുറച്ച് ഭാഗം തിളച്ച എണ്ണയിലേക്കിട്ടു. തിളച്ചു മറിയുന്ന കൂട്ടിലേക്ക് കുറച്ച് ഭാഗം ഇട്ടു. എൻറെ മാംസം വേവുന്ന മണം ഞാൻ അറിഞ്ഞു. വെന്ത കൂട്ട്, പാത്രങ്ങളിൽ പകുത്ത്, നിങ്ങൾ എല്ലാവരും കൂടി രുചിക്കുമ്പോൾ, എൻറെ അച്ഛനെയും, അമ്മയെയും, സഹോദരങ്ങളെയും, കൂട്ടുകാരെയും ഞാൻ ഓർത്ത് പോകുന്നു. ഞാൻ തിരിച്ചെത്തുമെന്ന് കരുതി കാത്തിരിക്കുകയാവുമോ അവരെല്ലാം ?